敬请期待
ꉪꊇꇬꉜꁨꑲꆏꇑꊉꂷꌩ

ꈯ ꎟ


   ꀉꑣꇱ  ꀉꑣꇱꌠꆹꆈꌠꃅꄷꐩꋊꀊꎴ,ꇱꄟꑌꀉꑌꑵꃅꐙꑵꉬ。ꀉꑣꇱꌠꆹꆈꌠꉹꁌꀊꉗꃅꒃꅐ、ꐥꐨꇬꄉꀻꎆꅷꇁꌠꉬ,ꋋꆹꆈꌠꋊꃅꐥꌠꁱꀕꇬꄹꁆꉬ。ꇱꄟꆹꂖ、ꉦꇔ、ꁮꃴ、ꇁꄉꄀ、ꐧꑠꏿꑠꀉꑌꑵꐥ。ꀉꑣꇱꌠꆹꆈꌠꃅꄷꇿꇬꑌꐥꈴꌐ,ꆈꌠꀉꁌꀉꂵꌠꆗꑮꆜꀊꉘꌠꏀꑠꇫꉌꃹꌐꌠꈯꎟꐘꉬ,ꀉꉘꌠꏀꑠꆏꇈꈬꇉꃪꑘꃅꊖꑣꒉꇬꑬꆏꄮꆏꀉꑣꇱꈩꇬꎷ,ꆈꌠꈎꏅ、ꄔꊒ、ꑮꑟꅪꏷ、ꀉꁌꀉꂵꃀꐚꄮꑌꀉꑣꇱꑟꃅ,ꄷꀋꁧꀉꑣꇱꊋꌠꆏꈁꁠꇯꊌꑵꉬ。

  

   ꉹꁻ ꉹꆹꆈꌠꉹꁌꐥꐨꇬꐩꋊꀊꎴ、ꀋꌬꀋꉆꌠꊨꏦꇭꀧꀕꌋꃅꌠꇇꌭꌋꆀꈌꌋꉆꈹꄮꇬꌬꌠꉁꈾꀉꆹꑵꉬ。ꀋꉊꂴꆈꌠꉹꁌꆹꊋꒉꌠꆏꇈꈬꇉꃪꈬꉘꃅꄷꀀꌠꉬꐛꅹ,ꌩꏪꇬꅉꀕꃅꑋꁮꉆꁮꇧꅐꇁꄉ,ꌺꃰꈧꌠꉈꏭꅐꁧꇬꆏ,ꀋꎪꃅꐳꉹꑠꀵꐺꇬꎷ。ꉹꁻꋑꄮꇬ, ꄉꁻꌊꀊꅰꃅꀊꎴꃅꒉꄎꄷꀋꁧꉈꑴꁻꌊꌸꅉꇬꌸꄎꌠꆏꌌꉹꁻꉔꌠꃅꄉ。

  

   ꃆꇭꋩꋑ ꃆꇭꋩꋑꌠꆹꆈꌠꋊꃅꐥꌠꈯꎟꐘꉬ,ꆈꌠꉹꁌꃅꇫꉌꃹꌐꑵ,ꎂꀕꃅꇬꈎꏅ、ꄔꊒ、ꈣꒉꃅꀉꁌꀊꂵꋩꈽ、ꆀꃅꊿꀘꑠꄮꆏꃆꇭꋩꋑꑟꃅ。ꃆꇭꋩꋑꄮꇬ,ꃆꇭꑞꂷꄉꀥꌊꐳ、ꀥꌊꂴꑞꅉꇬꑟꌠꆏꌌꃆꇭꀥꉔꂶꌠꃅꄉ。

  

   ꇌꁻꋑ ꇌꁻꋑꌠꆹꆈꌠꃅꄷꈍꄮꇯꆐꐥꅷꇁꌠ、ꉹꁌꃅꇫꉌꃹꌠꋊꃅꐥꌠꈯꎟꐘꉬ,ꇌꁻꋑꌠꆹꀊꆨꃀꌌꇌꍔꉾꃪꌠꌋꌠꏡꁈꉾꑵꑌꉬ。ꇌꁻꋑꇬꈀꄸꄰꃤꇋꄉꁻꌊꊊꆏ,ꈀꄸꄰꀑꑊꁤꇅꀕꌠꉬ。

  

   ꑻꇁꁻꋑ ꑻꇁꁻꋑꌠꆹꆫꃀꆫꌺꑿꆫꇈꈬꇉꃪꏪꁧꇬ,ꆫꌺꈧꌠꌓꀖꄉꑻꇁꋀꊇꈎꅸꐮꋍꈜꄉꐮꁻꄉ, ꄉꈀꄸꄰꑻꇁꄉꀉꇨꌠꉜ,ꑻꇁꁻꉔꌠꆏꊨꏦꃅꍯꑿꀉꁁꊈꇬꄉꁻꁧꇬꐥ,ꑻꇁꐮꁻꇬꉜꌒꐯꉜꌒꌠꀉꄂꀋꉬꃅ,ꑿꍒꉽꀋꉾꌠꑌꄚꄉꉜꅐꇁꉆꀐ,ꑻꇁꐮꁻꋌꑵꆏꊂꏭꀅꌳꀅꌳꃅꀻꎆꌊꈯꎟꐘꐛꀐ。

  

   ꃬꀮꌌꋖ ꃬꀮꌌꋖꋑꌠꆹꊿꋅꀉꑌꌠꐥꌐ,ꆈꌠꑌꄡꇗꃬꀮꌌꋖꋑꌠꐥ,ꆈꌠꃅꄷꃫꆏꈢꃬꉻꇬꊐꀋꄉꃅ,ꋊꉈꏭꏪꄉꑵ,ꄷꀋꁧꁡꇤꋋꂷꇬꃬꈧꌠꐥꐮꈴꄉ, ꃬꀮꈧꌠꋍꈜꅐꄮꇁꇬꆏ,ꐂꇁꐯꀳꄉꐮꋖ,ꀉꑳꈧꌠꃬꀮꐮꋖꋋꈨꊌꂿꇬꆏ,ꉜꌒꐯꉜꌒꑵꉬꄷꄉ,ꋌꇈꉈꆏꃬꀮꋀꊇꇱꈹꅷꋍꈜꄉꐮꋖꎻꇬꎷ,ꑠꃅꄉꃬꀮꋖꋑꋌꑵꆹꀻꎆꌊꆈꌠꃅꄷꈎꏅ、ꄔꊒꇬꈯꎟꀋꉬꀋꉆꐘꐛꀐ。

  

ꑌꑲꄆꅇ:0834-1234567ꑌꑲꒀꑣ:lszxxzx@163.com
ꌅꄉꀞꌠ:ꆃꎭꆈꌠꊨꏦꏱꅉꍏꏓꂱꍔꃚ
ꊪꄉꀞꌠ:ꆃꎭꆈꌠꊨꏦꏱꅉꍏꏓꂱꍔꃚꌤꀞꅉꋈꄻꀧꌋꃅꌠ:ꆃꎭꍏꈨꇐꈯꄜ(ꆃꎭꍏꏓꂱꍔꃚꈄꍉꃅꈧꏲꂠꈯꄜ)
ꎽICPꁱꄀ 05005182ꉸꇬꉢꌤꃅꅉꅺꇰꁱꄀꌐꂷ:51340003001129