敬请期待
ꉪꊇꇬꉜꁨꑲꆏꇑꊉꂷꌩ

ꀊꂥꊐꌠꂘꇐ


ꀒꎂꑪꑼꀑꐱꃆꂮ  

   ꀒꎂꑪꑼꆹꇩꏤꊐꌠꆫꈩꇓꈓ——ꌧꍧꌜꀒꎂꏃꐛ,ꅑꅸꀋꃅꑟꌠꌶꅉꀞꐩꋊꆹ70ꎖꈎꐥꀐ。ꀋꃅꀒꎂꑪꑼꆹ,ꂴꀒꎂꂿꑘꂥꊐꍋꈆꌶꅉ、ꀒꎂꂘꃀꌶꅉꂥꊐꍋꈆꌶꅉ、ꆃꎭꄊꑪ、ꆃꎭꂘꇐꑪꑼꋋꈨꌌꏓꐯꇯꄉꄻꐛꌠꋋꑍꃅꌷꌠꈆꑫꀉꑌꑵꀪꈆꌶꅉꉬ。

  

ꀒꎂꑪꑼ

   ꀒꎂꑪꑼꆹꃅꄷꇬꈇꌠꂿꑘꈆꑪꌧꊿ、ꇮꑘꈆꑪꌧꊿ、ꂘꇐꌧꊿ、ꏲꂠꌧꊿꑠꉙꂘ、ꉘꉚꌠꌌꂿꃆꀋꉬꀋꉆꌠꃅꄉ,ꌶꌺꑌꇐꑲꇐꂄ、ꌧꇐꂿꇐꐥ、ꀋꎪꀋꑴ、ꃅꉔꑽꉔꑠꇬꈴꄉꉙꂘꇈ,ꃅꄷꎆꏣꋈꄻꌠꎁꃅꌧꊿꂿꊿꀉꑌꈨꉘꉚꎼꇁꀐ。

   ꀒꎂꑪꑼꆹꌶꅉꀉꒉꂷꉬ,ꃄꅉꉻꊂ1851ꂿꐥ;ꋦꈭꋽꎔ,ꌜꊐꌠ“ꌩꇓꋦꁍꌶꅉ”ꉬ。ꌶꅉꑳꇤꋉꃆꉻꊂꆹ38.38ꃪꐽꎏꂰꐥ,ꌶꅉꆹꁸꌊꒈꂪ、ꒈꀑ、ꁭꅐꌕꈚꃅꄉ,ꄚꇢꊭꇬꒈꀑꒈꂪꑍꈚꌠꆹꂘꌷꀨꄉꅉꉬ,ꌶꅉꀪꀯꆏꌌꒈꀑꌶꅉꈚꌠꇬꄻꄉ。

   ꀋꃅꋋꇅꇬ,ꀒꎂꑪꑼꆹꂘꌷꌤꃅꅉ14ꂷꐥ,ꑍꊐꑪꑼ12ꂷꑌꇫꐊ,ꉈꑴꆏꉪꇐꍔꍞꀯꌋꆀꐪꊛꄉꉙꂘꑪꑼꑠꑍꈚꑌꄻꄉ。ꀪꈆꌐꑘꌷꑫ58ꑵꐥ,ꄚꇢꊭꇬꆏꐈꇗꌷꑫ、ꄹꇗꌷꑫ、ꂿꑘꌷꑫ、ꏲꂠꌷꑫ、ꁱꀕꌷꑫ、ꂘꇐꌷꑫ、ꎆꏣꌷꑫ、ꋽꇐꌷꑫꀉꒉꑠ8ꑵꇫꐊ,ꑍꊐꌷꑫ40ꑵꐥ。ꌶꌺꆏꇩꏤꑭꊂꌜ、ꊨꏦꏱꅉꐎ、ꎂꏲꏃꑍꊏꋋꂷꇬꄉꎹꌊꇁꌠꉬ。ꋋꑍꃅꌷꌠꌶꌺꌶꅉꇬꐥꌠꆏ16000ꎖꑹꐥ。

   ꂘꌷꉁꈾꉬꇮꁌꐨ1.7ꂡꂷꇬꑟ,ꄯꒉꄉꑳꇬꃷꁨꁱꂷꌬꀦꃷꁨ8730.5GB(ꄚꇢꊭꇬꄆꊪꑴꁱꄯꒉ2512.5GB;ꄯꒉꏂꀨ181ꃪꋐ);ꌜꊐꌠꀨꄉꋒꃯꉜꅉ5ꂷ、ꌜꊐꌠꃰꊿꁱꀕꀨꄉꎥꋯꅉ1ꂷ、ꌜꊐꌠꒉꌶꅉꋒꃯꉜꂘꌷꌶꀠꈯꄜ2ꂷꐥ;ꍰꄖ、ꀒꎂ、ꁁꍝꉷꃅꄷꋋꈨꇬꄉꂘꌷꃅꉚꅉ115ꂷꄻꄉꀐ。

   ꀋꃅꆹꂘꑘꌤꃅꊿ1000ꎖꑹꐥ,ꄚꇢꊭꇬꂘꃀꆏ750ꑹꐥ,ꏫꎵ、ꃛꏫꎵ360ꑹꐊ,ꎵꏃ、ꀨꏃꎥꃪꌶꌺ450ꑹꐊ。ꇩꃷꑼꐋꀋꌡꎆꃀꊌꌠꌐꌷꌧꃀ2ꂷꐥ,ꌜ(ꍏ)ꌷꃆꂴꐊꊿ、ꑆꊋꅐꌞꌐꌷꌧꃀ、ꈆꑪꇮꇐꂴꎆꅑꌧꊿ22ꑼꐥ。ꌶꅉꈆꑪꎥꋯꊋꃤꀉꇨ。2003ꈎꅑꅸꇁꌠ,ꈆꑪꎥꋯꐘꃆ574ꐘꌌꃅꇈ,ꌫꎆ5367ꎖꃪꂷꌌꌬ,꒔ꑞ꒔ꑵꈆꑪꇮꇐꊌꐨꈁꁠ427ꎖꐘꊌꋺ,ꋦꁧꀊꏀꇗꑫ12ꑵꉗꄻꎼꇁ,ꇩꏤꁧꀿꌐꌬꌅꅍ19ꐘꊌꅜ;ꌧꍣꁱꇐꄇꄜꋊꄉꄜꃑꌠ4282ꁬꐥ,ꄯꒉꁱꇐ159ꋐꍑꅐ。

   ꏣꀋꑌꃅꉇꄅꇩꏤꌧꃀꁨꌊꌧꇐꎥꃪꇁ、ꂘꃀꄻꇁ,ꂴꊁꃅꉇꄅꇩꏤꌧꃀ181ꑼꁨꌊꌧꇐꎥꃪꌋꆀꇷꃅꋺ。ꂰꇩ、ꄓꇩ、ꏝꀪ、ꑴꄗ、ꃏꇑꀘꇩꏤꋋꈨꒉꌶꅉ、ꈆꑪꎥꃪꅉꌋꆀꈆꑪꇮꇐꎥꋯ、ꇷꃅꌠꄻꐛꀐ。ꂰꇩ、ꑱꇩ、ꑴꄗ、ꃏꇑꀘꇩꏤꋋꈨꌷꏷꌶꌺ12ꑼꀒꎂꑪꑼꄉꁱꂷꌷ,2005ꈎꆏꌌ“ꌧꍧꌜꂘꇐꉇꄅꌤꆿꌤꃅꂴꎆꅑꌤꃅꅉ”ꃅꄉ。

   ꏣꀋꑌꃅꊇꁧꂘꇐꌋꆀꃅꑘꄐꇺꌠꍔꐯ。2005ꈎ、2008ꈓ,ꌌ“ꇩꏤꑭꊂꄊꍏꍋꌶꌺꉌꇗꃅ‘ꌒꑤꑣ’ꐧꋦꃄꄻꃅꈧꂴꎆꅑꌤꃅꅉ”ꃅꄉ。ꀋꆏꃅꌶꅐꌶꌺꃅꑘꎹꌤꃅꅉꄻꐛꒆ,ꏣꀋꑌꃅꀕꑘꎹꃷꎏꀹꄻ,ꃅꑘꎹꈴꈜꍔꐯ,ꌶꅐꌶꌺꃅꑘꎹꊌꐨꆹꊼꇅꀊꂥꇬꎷ,ꊛꄉꇖꈎꌌ“ꌧꍧꌜꃅꑘꎹꌤꃅꅉꂴꎆꅑꉻꁥ”ꃅꄉ。

ꑌꑲꄆꅇ:0834-1234567ꑌꑲꒀꑣ:lszxxzx@163.com
ꌅꄉꀞꌠ:ꆃꎭꆈꌠꊨꏦꏱꅉꍏꏓꂱꍔꃚ
ꊪꄉꀞꌠ:ꆃꎭꆈꌠꊨꏦꏱꅉꍏꏓꂱꍔꃚꌤꀞꅉꋈꄻꀧꌋꃅꌠ:ꆃꎭꍏꈨꇐꈯꄜ(ꆃꎭꍏꏓꂱꍔꃚꈄꍉꃅꈧꏲꂠꈯꄜ)
ꎽICPꁱꄀ 05005182ꉸꇬꉢꌤꃅꅉꅺꇰꁱꄀꌐꂷ:51340003001129